Jastin San asos solgan kripto loyihasi Tron, AQSHda IPO qilishga tayyorlanmoqda, bu qaror AQSH moliya regulyatorlari uning kompaniyalariga qarshi olib borilgan tergovni vaqtincha to‘xtatganidan so‘ng e’lon qilindi.

Tron, Nasdaq ro‘yxatidagi SRM Entertainment kompaniyasi bilan birlashib, IPO qiladi. Bitim Donald Tramp Jr. va Erik Tramp bilan aloqador Dominari Securities investitsiya banki tomonidan tuzilgan.

Yangi tashkil etiladigan kompaniya – Tron Inc – asosiy faoliyati sifatida Tron tokenlarini saqlaydi va boshqaradi. Bu Michael Saylor’ning MicroStrategy kompaniyasi kabi kripto aktivlarni jamg‘arish modelini takrorlaydi. Manbalarga ko‘ra, Erik Tramp kompaniyada rasmiy lavozim egallashi kutilmoqda.

Bitim doirasida Tron 210 million dollarlik token aktivlarini kompaniyaga o‘tkazadi. Bu esa Tramp prezidentlikka qaytgach, kripto sanoatiga ochiq qo‘llab-quvvatlov bildirgani ortidan yuzaga kelgan kripto va siyosatdagi yaqinlashuvni ko‘rsatadi.

Eslatib o‘tamiz, 2023-yilda AQSH Qimmatli qog‘ozlar komissiyasi (SEC) Tron va Jastin Sanning yana uchta kompaniyasini ro‘yxatdan o‘tmagan tokenlar sotganlik va bozor manipulyatsiyasida ayblagan edi.

Ammo 2024-yil fevralida, Tramp yumshoq tartibga solish tarafdori ekanini bildirganidan keyin, SEC va San ishni muzlatish va kelishuvga erishish uchun ariza topshirdi. Shundan so‘ng, Jastin San Tramp oilasi bilan aloqalarni mustahkamlashga harakat qildi. May oyida u va Trump memecoin’ning 24 yirik egasi Tramp bilan birga golf klubda banketda qatnashdi.

Shuningdek, San Tramp oilasiga tegishli World Liberty Financial kompaniyasiga 75 million dollar sarmoya kiritdi. Trampning o‘zi bu kompaniyadan 57 million dollar daromad olgan. Yaqinda World Liberty o‘zining birinchi stablecoinlarini aynan Tron blokcheynida chiqarishga muvaffaq bo‘ldi.

Jastin San – kripto dunyosidagi eng tanilgan va bahsli shaxslardan biri. 2019-yilda u Uorren Baffett bilan tushlik qilish uchun 4,6 million dollar to‘lagan. O‘tgan yili esa devorga yopishtirilgan bananga 6,2 million dollar sarflab, uni jurnalistlar oldida yeyish orqali shov-shuvga sabab bo‘lgandi. U Xitoyda tug‘ilgan bo‘lsa-da, hozirda Sent-Kits va Nevis fuqarosi va ilgari Grenadani Jahon savdo tashkilotida vakillik qilgan.

Tron bilan birlashadigan SRM Entertainment kompaniyasini tanlagan Dominari Securities — Tramp minorasida, Tramp tashkiloti ofislaridan ikki qavat pastda joylashgan. Dominari Holdings aksiyalari Donald Tramp Jr. va Erik Tramp kompaniya maslahatchi kengashiga qo‘shilganidan keyin 580% ga oshgan.

Tramp o‘g‘illari bilan bog‘liq yana bir kompaniya – American Bitcoin – ilgari Dominari’ga qarashli bo‘lgan. Keyinchalik u Hut 8 kompaniyasi bilan birgalikda bitkoin mayningi va strategik zaxira yaratish uchun qayta brending qildi. Dominari Securities shuningdek, Ilon Maskning xususiy kompaniyalari – SpaceX va xAI uchun ham sarmoya to‘plagan.