O‘zbekiston yaqin orada davlat obligatsiyalariga bog‘langan va blockchain texnologiyasida yaratilgan yangi raqamli aktiv – HUMO tokeni bo‘yicha sinov dasturini boshlashni rejalashtirmoqda. Tashabbus mamlakatda raqamli moliyaviy infratuzilmani rivojlantirish hamda investitsiya jalb qilishning muqobil usullarini sinab ko‘rishga yo‘naltirilgan.

Token davlat obligatsiyalari bilan ta’minlanadi va O‘zbekiston so‘miga nisbatan 1 HUMO = 1 000 UZS kursida muomalaga chiqadi. Raqamli aktivlar segmentida ko‘p uchraydigan o‘zgaruvchanlik xavfini kamaytirish maqsadida narxni barqaror ushlab turish mexanizmlari ishlab chiqilgan.

Loyiha mamlakatdagi kriptoaktivlar bo‘yicha amaldagi qonunchilik doirasida ishlab chiqilgan.

Texnik yechim va ishtirokchilar

Loyiha HUMO to‘lov tizimi infratuzilmasi asosida shakllanadi. Ayni paytda bu tizim 35 milliondan ortiq karta egalariga xizmat ko‘rsatmoqda va bank hamda chakana savdo segmentlariga chuqur integratsiyalashgan. Ushbu tayyor infratuzilma token muomalasiga oson kirib borish imkonini yaratadi.

Texnik tomondan loyiha ustida mahalliy Asterium kompaniyasi va xalqaro blockchain xizmat ko‘rsatuvchisi Broxus ishlamoqda. Loyiha Ethereum (EVM) va TON (TVM) virtual mashinalari uchun moslashtirilgan bo‘lib, Broxus’ning Tycho protokoli TVM bo‘yicha asosiy poydevor hisoblanadi. Ushbu protokol tranzaksiyalar tezligini oshirish va xarajatlarni kamaytirish kabi texnik afzalliklarga ega.

Potensial ta'sir va xulosalar

HUMO tokenining blockchain asosida ishlashi orqali operatsiyalarni real vaqt rejimida kuzatish, tranzaksiya xarajatlarini qisqartirish va shaffoflikni oshirish maqsad qilinmoqda. Mazkur yondashuv norasmiy pul aylanishini qisqartirish hamda to‘lov tizimini raqamlashtirishda qo‘shimcha vosita sifatida ko‘rilmoqda.

Loyihaga aloqador rasmiy vakillar tokenning joriy etilishi orqali raqamli infratuzilmaning ishonchliligi va samaradorligini oshirish, firibgarlik xavflarini kamaytirish mumkinligini ta’kidlagan.

Shuningdek, texnologik yetkazib beruvchilar bu kabi davlat loyihalari uchun yuqori tezlik, arzon tranzaksiyalar va ochiq infratuzilma zarurligini ta’kidlaydilar. Kelajakdagi ejtimoliy yo'nalishlar

Agar loyiha muvaffaqiyatli amalga oshsa, u nafaqat moliyaviy tizimga, balki raqamli davlat xizmatlari va e-hukumat infratuzilmasiga integratsiyalashish imkoniyatini ham ochib berishi mumkin. HUMO tokenining asosiy afzalligi – u real aktiv bilan ta’minlangan va regulyator nazoratida yuritiladi.

Hozircha loyiha sinov bosqichida bo‘lib, uning muvaffaqiyati texnologik barqarorlik, foydalanuvchi ishtiroki va regulyatorlar pozitsiyasiga bog‘liq bo‘ladi.