AQShdagi eng yirik kriptovalyuta birjasi Coinbase va SEC o‘rtasida davom etayotgan ish bo‘yicha yangi qaror Bitcoin narxiga ta’sir ko‘rsatdi.

Coinbase va AQSh Qimmatli qog‘ozlar va birja komissiyasi (SEC) o‘rtasida davom etayotgan ishda sudya Coinbase mamlakat qonunlari doirasida fond birjasi, vositachi va savdo kompaniyasi sifatida faoliyat yuritishini aytishi bilan birgalikda birjaning staking dasturi qonunlarga to‘g‘ri kelmasligini bayon qildi.

Coinbase avvalroq SEC ayblovini rad etish uchun ariza bergan edi. Sudyaning yakuniy qaroriga ko‘ra, ushbu ariza qanoatlantirilmagan. Sud, shuningdek, Coinbase’ning hamyonda saqlayotgan aktivlari masalasi bo‘yicha SEC da’volariga qarshi chiqdi.

Eslatib o‘tamiz, o‘tgan yilning iyun oyida ro‘yxatdan o‘tmagan faoliyat turini amalga oshirib turganligi uchun Coinbase’ga qarshi ochilgan da’vo arizasida Qimmatli qog‘ozlar va birja komissiyasi SOL, ADA, MATIC, FIL, SAND, AXS, CHZ, FLOW, ICP, NEAR, VGX, DASH va NEXO tokenlarini qimmatli qog‘ozlar ekanligini da’vo qilgan edi.

CoinGecko ma’lumotlariga ko‘ra, sud ish bo‘yicha qaror qabul qilinishidan biroz avval Bitcoin narxi so‘nggi 10 kun ichida eng yuqori darajasiga yetib, 71 800 dollarni tashkil qilgan. Sud qarori bilan Bitcoin narxi 4 foizdan ko‘proqqa keskin tushib ketib 69 050 dollarni tashkil qilgan.